Goli la MAMA lafikia Tsh. milioni 10 hatua ya Robo Fainali CAF

Goli la MAMA lafikia Tsh. milioni 10 hatua ya Robo Fainali CAF – RAIS wa Tanzania, Dk Samia Suluhu Hassan ameongeza hamasa kwa Vilabu vya Yanga na Simba katika mechi zao za robo fainali katika michuano ya Kimataifa ya Klabu Bingwa Afrika ambapo atakuwa akitoa Tsh. milioni 10 kwa kila bao lililofungwa kutoka Tsh. milioni 5 alizokuwa akitoa katika hatua ya makundi.

Waziri wa Utamaduni, Sanaa na Michezo Dk Damas Ndumbaro amesema hayo leo Machi 20, 2024 alipokutana na kufanya mazungumzo na viongozi wa Shirikisho la Soka Tanzania (TFF), Bodi ya Ligi Kuu (TPBL) na wawakilishi kutoka klabu za Simba na Yanga. kujadili masuala mbalimbali yanayohusu maendeleo ya michezo hapa nchini na kuweka mikakati ya Vilabu vya Tanzania vinavyoshiriki michuano ya Klabu Bingwa Afrika kufanya vizuri katika michuano hiyo.

Ndumbaro alisema “Unaona Mama yetu Dk.Samia Suluhu Hassan ameongeza dau ili timu zetu mbili ziweze kufanya vizuri na kupata mafanikio zaidi, tumeziambia timu zote mbili zishirikiane na Serikali katika kipindi hiki ili kupata mafanikio, hivyo timu hizo mbili zitakwenda kujipanga na kusema wanachotakiwa na Serikali kuhakikisha wanafanya vizuri kwa upande wa Serikali tuko tayari, uwanja upo tayari, masuala yote ya usalama yapo tayari, maandalizi ya tiketi yapo tayari. na mambo mengine ambayo ni muhimu kwa Serikali kuyafanya ili mechi hizo zifanyike vizuri”

Simba inatarajiwa kucheza na Al Ahly ya Misri katika mchezo utakaopigwa Machi 29, 2024 huku Yanga ikijiandaa kuvaana na Mamelodi Sundowns kutoka Afrika Kusini katika mchezo utakaofanyika Machi 30, 2024 kwenye Uwanja wa Benjamin Mkapa. jijini Dare es Salaam.